انا ابعرف بس وش السر الا منه جت الشغاله تكنس الصاله جيت وتسدحت انت واخوانك وسبحان الله ماتحلا لكم الجلسه الا اذا اقبلت هالشغاله تنظف
يايمه وش هالحتسي الله يهديتس بس ... تراها قطعة شغاله لاراحت ولاجت ووجها مافيه من الزين شي اللهم عافنا
وبعدين عشان مايروح تفكيرك منا والا منا ترا مايجيبنا الا هالمسلسل اللبناني ولاهوب ذنبنا ان الشغاله ماتجي تنظف الا هالوقت وانتم بعد كل ماقلنا مدوا لنا سلك من هالدش بغرفنا قلتوا معصي
ودي اصدق وانا امك بس البلا اني مااشوف عيونكم للتلفزيون جعلكم العمى مغير تلاحقون هالشغاله بعيونكم
عاد يمه من زينها هالشغاله يوم نلاحقها ؟؟ صح انها توه ام 22 سنه لكن عاد ماتوصل اننا ننزل مستوانا لشغاله
ايه مايخالف وانا امك ناظر مسلسلك بس ولاتكثر حتسي ماله سنع بس وان الله قاله هالشغاله مهوب تام(ن) هالشهر الا وهي تحب راس امه بأندونيسيا
لالالالالاعاااااد يمه ترا اشين شي تقطعين رزق احد فما بالك عاد اذا صارت مسلمه وتكد على جيش وراها ومثل ماقال الشاعر قطع الارزاق ولا قطع الاعناق
قطع الارزاق اجل ياقليل الحيا !!!! قم فاردز نعنبو هالفره ياللي ماتستحي ورا يوم امينه هذيك الاوله يوم سفرناها ماقلت قطع الاعناق مدري وش والا شايفها تصلي قدام تمثال ياقليل خوف الله
_________________________________________
اسمع ياناصر ترا هاللي قاعد يصير ماينسكت عليه ياخي ... ترا امي كلمتني وهي منحرجه منك انت وبدر وتقول كل ماجت الشغاله تكنس الصاله جيتوا وتسدحتوا وعيونكم مغير تلاحق هالشغاله
اجل امي موصيتك يامحمد هاه اشوا اني كنت نازل من الدرج ويوم سمعتها تهاوشك استحيت ادخل وقلت مهوب لازم نشوف المسلسل اللبناني اليوم
والله ياناصر ماادري وش اقولك لكن صراحه انا اصلا ماافكر بهالشغاله ابد ولاعمرها طرت على بالي لكن انت الصراحه تجيب الشبهه لنفسك والا وش تفسر لي بطاقات الاتصالات هاللي تشتريها لها كل شوي وافلام الكاميرا اللي كل يوم والثاني جايبها لها والله لو انها ستديو زماني بكبره مااستهلكت هالافلام
يامحمد انت مافي قلبك رحمه ياخي ؟؟ لاتنسى ان هالضعيفه متغربه وتاركها اهلها عشان تكد عليهم وبعد لاتنسى انها في غربه .. ياخي حط نفسك مكانها ياخي .. وبعدين ترا انا مااعتبرها الا مثل اختي
_________________________________________
حسبي الله على هالعيال يابومحمد تسانهم هبلوا بي وماصار لي شغله الا اراقب هالشغاله ولاصار ليلي ليل ولا نهاري نهار ... خايفتن من هالمهبل يسوون شي همن نبلش بهالشغاله
الله يهديتس يام محمد ترا الوسوسة الزايده مالها سنع وبعدين ترا عيالي ماتطلع منهم هالحركات ابد ابد
ايه هين ماتطلع منهم هالحركات ... بلاك والله ماشفت اللي شفته انا والا علمني تكفى وش مرقي محمد لغرفتها الساعه 2 بالليل والحمدلله اني طلعت وشفته وهو يرقى لها ويوم قلت له وش عندك راقي قال ابد يمه بس ثيابي معطيها الشغاله تكويها ولاجابتها وابروح للجامعه الحين ولا لقيت ثوب البسه اللي مايخاف الله بيروح للجامعه الساعه 2 الليل !!!!!
والا ناصر هالخبل وانا رايحة للمطبخ الصبح والقاه مرتز بمجلس الحريم ويطل مع الدريشه وفاقن خشته ويوم طليت ابشوف وش هاللي مسبه به والا الشغاله تغسل الحوش ورافعتن قميصها ومطلعتن سيقانها خايفتن من المويه مادرت ان **** القايله يترصدها مع الدريشه ويوم هاوشته قال انه سامعن خرفشه بالحوش وجلس يطلطل يخاف ان الشغاله مدخلت(ن) واحدن من عمال البلديه والااااش
ههههههههههههههههههههههههه هههههههههههه الله يرجهم هالعيال<<<< شكل ابوهم من اللي يردون بالقهوة
والله كبروا العيال يام محمد وصاروا يعرفون هالامور
ايه طالعين عليك .. ماجابوا شي من برا .. والا تحسبني ماادري عنك اذا رحنا للسوق وانت عيـناتك تلاقط على هالحريم ورويسك تسنه هاك المروحه القعاديه اللي تروح يمين ويسار
اسمع يابو محمد ياانا ياهالشغاله بها البيت .. لاااااازم تسفرها والا تبي باتسر واحد(ن) من عيالك يجيب لنا مصيبه ويبلشنا مع الشعب الاندونيسي همن ماتبقى ولا جريده الا ويحتسون عنك وعن عيالك وسواياهم
لاحول ولا قوة الا بالله وش هالحتسي اللي يضيق الصدر يام محمد الشغاله ومابقى لها الا ثلاثة اشهر وينتهي عقدها واللي صبرنها هالسنه وتسع شهور بيصبرنا هالثلاثة اشهر لكن مايمنع اني اطلع لها خروج نهائي الحين ونقدم على شغالة ثانيه وان جت الشغاله قبل الثلاث شهور فحنا بنسفر هالبلشه اللي عندنا
ايه يابومحمد عاد الله يعافيك اشرط عليهم وقل نبيها بالخمسين ونبيها شينة الا شيفة تروع
الا يام محمد ورا مانعطي المكتب صورتس ونقول نبيها مثل هذي
__________________________________________________ ___________
وراك نايم بالمجلس يبه عسى ماشر؟؟
ابد وانا ابوك بس ذبحني المكيف ولا بغيت اضيق صدر امك واطفيه قلت خلني انام بالمجلس ازين لي
__________________________________________________ ________
يالله هذاهم بدوا يهلون .... يالله حيهم عيالي ماشاء الله عليكم جاين بوقتكم ورا مير يوم جيتوا ماجبتوا المكنسه الكهرب على طريقكم عشان اذا جت الشغاله تلقى كل شي والم وتبدأ تكنس وتنظف الصاله
الله يهديتس يمه الحين هذا جزانا اللي جايين بنسولف معتس ونوسع صديرتس ... ايه ماعليه مهما صار انتي امنا ومثل ماقال الرسول عليه الصلاة والسلام الجنة تحت اقدام الامهات
ماشاء الله عليك وانا امك .. وش هالطوع اللي نزل عليك .. وش هالبر وانا امك ايه ماعليه اجل يوم انكم جايين تسولفون معي اشوا اني قلت للشغاله لاتكنس الا بعد المغرب يالله وانا امكم سولفوا علي
ايييييييييه الله يلعن الشيطان اللي خلاني انسي .. معليش يمه انا عندي محاضره بعد العصر يالله عساني الحق عليها وهالدكتور عاد نشبه الله يقلعه ... يالله فمان الله يمه
محاضره اجل !!! ايه مايخالف ... طس وانا امك لجامعتك فمان الله
وانا بعد يمه ابخلي محمد يوديني على طريقه للصناعيه حاط(ن) موتري هناك وابروح اخذه ... يالله فمان الله يمه
طسوا لابارك الله فيكم من عيال حسبي الله عليهم من عيال ... وين اللي يقول تو الجنه تحت اقدام الامهات
__________________________________________________ ___
افتحي الباب يام محمد .. افتحي الباب الله يهديك .... يالله اخلصي تراني تعبان وابنام
سلامات يبه وش فيكم ؟؟
انا ادري عن امك يامحمد وش عندها قافلتن باب الغرفه
ام محمد افتحي الباب وجـــــــــــــــــــــــ ـــــع ...
ومن خلف الباب ترد ام محمد بصوت مقهوووور :
اسمع يابومحمد : منيب فاتحه الباب ورح نم بالمجلس والا بالمطبخ ان شاء الله وتراني منومه الشغاله عندي بالغرفه وعساها تسلم من هالدشير عيالك ولانيب فاتحه الباب الا وانت موريني تذكرة سفر هالشغاله
بس خلاص
20-Sep-05, 07:43 PM
ازمة الشغالات في البيوت السعوديه(قصه خنبوقيه) 
العرض العادي
